Bi pjaċir ninfurmak li l-appuntament ewlieni fil-kalendarju mużikali tas-Soċjetà tagħna reġa’ wasal. Nhar is-Sibt 17 ta' Mejju 2014, ġewwa t-Teatru Notre Dame f'Ħaż-Żabbar, il-Banda tas-Societa’ Filarmonica Maria Mater Gratiae din id-darba se tippreżentalna Be Our Guest - kunċert ta' mużika għat-tfal u għal dawk kollha li f'qalbhom jgħożżu l-memorji ta' tfulithom.
Il-mużika minn dan il-ġeneru magħżula għal dan il-kunċert tinkludi l-famuża signature tune minn "Tom and Jerry" segwita mill-overture popolari "Die Fledermaus" ta' Johann Strauss II. Tindaqq ukoll is-silta "Peter u l-Lupu" bis-sehem tan-narratur Trevor Zahra, u ma jonqsux biċċiet popolari mid-dinja ta' Disney bil-medley "Disney March Spectacular", u b'selezzjonijiet immortali minn films animati bħal "Beauty and the Beast", "The Lion King" u riċentament mill-film "Frozen". Ser jitkantaw ukoll "When You Believe" mill-film "The Prince of Egypt", "You'll Be In My Heart" minn "Tarzan", u l-kanzunetta popolari "We Are The World" ta' Michael Jackson.
Taħt id-direzzjoni tas-Surmast Kevin Mizzi B.Sc.(Hons.), M.Sc., LLCM, il-Banda tagħna ser tkun ukoll akkumpanjata mill-Mirabitur Youth Choir taħt it-tmexxija ta' Ms. Simone Attard. Ser jippreżentaw is-serata s-Sur Keith Demicoli u s-Sinjura Claire Agius Ordway.
Inħeġġuk għalhekk sabiex tattendi għal dan l-ispettaklu mużikali u awdjo-viżiv. Is-serata tibda fis-7.30 ta’ filgħaxija u bħal dejjem l-entratura ser tkun mingħajr ħlas, għalkemm inħeġġuk sabiex ġentilment tkun ġeneruż fid-donazzjoni tiegħek.